Град Скопје го бележи најдобриот прв квартал во својата историја според реализацијата на капиталните инвестиции, соопшти градската администрација, нагласувајќи дека за првпат е постигната рекордна реализација уште во првите месеци од годината.
Според објавените податоци, во Основниот буџет за 2026 година биле планирани капитални инвестиции во износ од 1,85 милијарди денари, што претставува зголемување од 32,4 проценти во однос на претходната година. Во првиот квартал биле реализирани 335,75 милиони денари, односно 18,12 проценти од вкупно планираните капитални инвестиции, што се смета за најдобар резултат досега за овој период од годината.
Од Град Скопје истакнуваат дека позитивниот тренд продолжува и во вториот квартал. Само во месец април биле реализирани капитални инвестиции во вредност од 464,45 милиони денари, што е оценето како највисока априлска реализација во историјата на градот. Заклучно со 8 мај 2026 година, вкупната реализација надминала 480 милиони денари, со што веќе се реализирани 26 проценти од планираните капитални инвестиции за целата година.
Во соопштението се наведува дека овие резултати се постигнати и покрај наследените долгови, нефункционалните системи и тешката финансиска состојба во јавните претпријатија. Градската администрација оценува дека со дисциплинирано и одговорно работење започнала стабилизација на системот и враќање на редот во функционирањето на институциите и јавните служби.
Паралелно со капиталните инвестиции, обезбедени биле средства и за исплата на наследени субвенции за граѓаните, вклучувајќи мерки за велосипеди, азбестни кровови, инвертер-клими, чистење оџаци, како и за средношколски стипендии. Дополнително, за јавните претпријатија биле обезбедени повеќе од 467,9 милиони денари субвенции со цел стабилизација на нивното работење и подобрување на јавните услуги.
Од Градот информираат и дека во изминатите 4,5 месеци обврските на јавните претпријатија биле намалени за околу 38,5 милиони евра, при што најголемо намалување е регистрирано во ЈП „Водовод и канализација“. Воедно, обврските на самиот Град Скопје биле намалени за околу 11,6 милиони евра, а исплатени биле и долгови по основ на експропријација, тужби и преземени обврски.
Од градската администрација порачуваат дека ова е само почеток на процесот на стабилизација и развој на Скопје, најавувајќи продолжување на инвестициските активности и реализација на нови проекти во интерес на граѓаните.
