Два руски проектили погодија хотел во Харкив, вториот по големина град во Украина, а според градоначалникот, 11 лица се повредени, меѓу кои и двајца турски новинари.
Од објавените фотогравии на се гледа дека хотелот претрпел голема штета, а се гледаат и пожарникари кои го гаснат пожарот. Ракетите го погодиле хотелот синоќа околу 22:30 часот.
По последниот напад, девет лица се пренесени во болница, меѓу кои и еден маж во тешка состојба. Во хотелот во моментот на нападот имало 30 цивили, без ниту еден војник. Оштетени се и домови и автомобили во близина, јавува Би-Би-Си.
Харкив, кој редовно е цел на руските напади, во март ќе го отвори своето прво подземно училиште, јави ДПА.
Изградбата на училиштето во индустриската зона на градот се одвива според планот и покрај непријателскиот оган и студената зима, напиша вчера на „Телеграм“ градоначалникот Игор Терехов.
Веќе се изградени првите бетонски потпорни конструкции. Сега се работи на изолација, вентилација и водовод и канализација, рече градоначалникот.
Во градското метро функционираат близу 65 импровизирани училници. Во моментов на овој начин барем делумно се образуваат околу 1.000 основци.
Според властите, само околу 40 отсто од повеќе од 110.000 студенти сè уште остануваат во Харкив. Голем број од нив побегнале во странство, а многу од оние кои ја напуштиле земјата студирале од далечина во нивните претходни училишта.
Русија ги интензивираше нападите врз украинските градови во последните две недели, а официјални лица тврдат дека десетици цивили биле убиени во напади со беспилотни летала и проектили. Харкив, град на само 30 километри од руската граница, претрпе огромни штети од руските воздушни напади откако Путин ја започна инвазијата во февруари 2022 година.
Подготви: Ј. Ѓ.
Поврзано:
Украинскиот град Харкив се подготвува да го отвори своето прво подземно училиште
