Оперативни проблеми, скандали меѓу коалициските партнери, проблеми во образованието – ова е почетокот на владеачкиот маратон на Владата на Христијан Мицкоски.
Што ако нема покачување на платите во образованието до 20 септември? Ќе штрајкуваат ли наставниците?
Од друга страна, Демократската унија за интеграција (ДУИ), партијата на Али Ахмети е во потрага по легитимитет, најавувајќи дека со протести ќе го радикализира своето политичко дејствување, додека Социјалдемократскиот сојуз на Македонија бара економски и социјален напредок – теми за кои ВМРО ДПМНЕ не сака многу да се зборува.
На универзитетската професорка Ана Чупеска не ѝ е сосем јасна тактитака на ДУИ и нивната релација со ВМРО-ДПМНЕ т.е. нивна заедничка корпоративна историја, додека кај СДСМ забележува мало помрднување.
– Се уште не ми е сосем јасна тактитака на ДУИ, уште помалку па нивната релација со ВМРО-ДПМНЕ т.е. нивната заедничка корпоративна историја. А кај СДСМ, како што можам да зебележам има мало помрднување, но незначително. Очигледно дека им е потребно повеќе време за консолидирање, изјави Чупеска за „Фронтлајн“.
Професорката се уште верува дека ќе се најде решение за состојбата во образованието, кое со години наназад е во катастрофална состојба и, како што нагласува таа: „овој прикажан ентузијазам на министерката ми дава извесна надеж за платите“.
– Верувам дека тие проблеми ќе се надминат. Но, сметам дека уште поголем предизвик за неа ќе биде високото образование: особено оние „приватните“ за кои знаеме како делат дипломи. Убаво се сеќавам дека во емисија на ТВ 24 вети дека тоа ќе биде нејзин фокус, и навивам за една таква сериозна ревизија во образованието, посебно дипломите, потенцира нашата соговорничка.
Политичкиот аналитичар Дритон Зенку смета дека власта мора да биде имуна на обвинувањата на опозицијата, но и опозицијата треба да биде коректна, особено во првите 100 дена од власта.
– Улогата на опозицијата треба да биде корективна кон власта, а власта да не се комплексира со обвинувањата што доаѓаат од опозицијата. Тоа се вредностите на демократскиот систем. Во ваква политичка битка, власта и опозицијата мора да постапуваат внимателно. Да не поттикнуваат насилни, деструктивни дејствија и да не предизвикуваат омраза и поделби меѓу граѓаните. Опозицијата мора да си ја врши работата, да ја следи власта чекор по чекор и да ги изнесува своите позиции. Есента нема да биде тивка од политички аспект, опозицијата бурно ќе ги изнесе своите ставови, вели Зенку за „Фронтлајн“.
Според него, СДСМ реши битката да ја води на економски теми, додека ДУИ и Европскиот фронт ќе се стремат да го канализираат своето делување во контекст на каузата за легитимитет.
– Мислам дека нема да има протести и не очекувам да има тензии на терен. Дебатата ќе се одржи во собранието, телевизиските студија и социјалните мрежи. Мислам дека политичкото триење нема да се префрли на улица, особено не во првите месеци од владеењето на оваа влада, подвлече тој.
Во првите денови од формирање на новата влада на Христијан Мицкоски, државата се задолжи кај унгарската влада на Орбан со кредит од милијарда евра.
Уставните измени што се „виза“ за понатамошното патување на државата на патот кон ЕУ – со различни политички изговори се одложуват, без притоа Владата да нуди излезен пат. Од друга страна и со Грција се влошени односите без никаква потреба неколку пати, почнувајќи со неупотребата на државното име од страна на највисоките државни функционери.
Највите дека нема да има од септември зголемување на платите за наставницте, како што е предвидено со закон, како и манипулациите со пензионерите дека ќе им се зголемат пензиите за 5.000 денари, го доведува новото парламентарно мнозиство да игра на картата „дестабилизација на државата“, но притоа за ова да ја обвинат опозициската ДУИ на Али Ахмети, која најавува протести од септември за, како што рекоа од Мала Речица, легитимноста на албанскиот глас.
Премиерот Христијан Мицкоски на средбата на Илинденска број 2 одржана на 20 август со претседателката на Судскиот совет Весна Дамева, состојбата во судството и довербата на граѓаните во судскиот систем ја окарактеризира како безбедносна закана.
– Ако немате правна држава, владеење на право, ако имате високо ниво на криминал и корупција тоа е безбедносен проблем. Тоа го кажале многу поискусни од мене. Ние како Влада имаме основна задача да ја заштитиме државата и граѓаните доколку се појави безбедносен проблем. За нас невладеење на право, криминал, перцепција за корупција и елитите се безбедносен проблем за нашата држава и ние како Влада мора да реагираме. Во овој период ќе собираме предлози и идеи и потоа ќе излеземе пред јавноста. Ние стоиме на ставот за распуштање на институциите Совет на јавни обвинители и Судски совет. Не очекуваме брзи резултати туку очекуваме напредок со кој ќе го превенираме овој безбедносен проблем, рече Мицкоски.
Од друга страна САД и ЕУ му изразија поддршка на Судскиот совет. Според нив, распуштањето на Судскиот совет и на Советот на јавни обвинители, ќе значи мешање во независноста на судската власт и ќе биде прашање за сериозна загриженост.
Дестан Јонузи
