Транспаренси интернешнал (ТИ) ја објави листата на случаи и дејствија поврзани со коруптивно однесување и борба против корупцијата, во категоријата „Бистро -Матно“.
Во категоријата матни настани за месец август 2024 година на прво место е случајот на врховниот судија Наќе Ѓорѓиев зa примање поткуп и спогодбата со Обвинителството, додека во категоријата јасни настани за месец август, на прво место е кривичната пријава за злоупотреба на службената положба на в.д директор на општинското претпријатие Гази Бабе, под сомнение дека го оштетил буџетот на општината за 1.218.000 денари. Како други главни настани во категоријата турбулентни настани е случајот со членот на Јавното обвинителство, Иџет Мемети, кој ја призна вината и се согласи со обвинителството.
НАЌЕ ГЕОРГИЕВ ПРИФАТИ ТРИГОДИШНА ЗАТВОРСКА КАЗНА ЗА МИТО ОД 15.000 ЕВРА
Врховниот судија Наќе Георгиев се спогоди со Основното јавно обвинителство за гонење на организиран криминал и корупција во врска со случајот за земање мито од синот на ексградончалникот на Ново Село Боро Стојчев и прифати да му биде изречена казна затвор во траење од три години, како и Забрана за вршење професија, дејност или должност на службено лице во период од три години. Во истиот случај, спогодба со обвинителството склучи и членот на Советот на јавни обвинители Иџет Мемети, кој доби една година затвор условно и истата Забрана за вршење професија, дејност или должност на службено лице во период од три години.
ИЏЕТ МЕМЕТИ ПРИЗНА ВИНА И СЕ СПОГОДИ СО ОБВИНИТЕЛСТВОТО
Членот на Советот на јавни обвинители и поранешен Народен правобранител, Иџет Мемети признал вина за примање награда за противзаконито влијание и се спогодил со Основното јавно обвинителство за гонење на организиран криминал и корупција за условна казна. Мемети доби и забрана за вршење на дејноста во наредните три години. Тој до Собранието поднел неотповиклива оставка како член на Совет на јавни обвинители.
ДКСК СО ВРЗАНИ РАЦЕ: 826 ИНСТИТУЦИИ БЕЗ ДОСТАВЕНИ ИНФОРМАЦИИ, МЕЃУ КОИ И 10 МИНИСТЕРСТВА
Државната комисија за спречување на корупцијата (ДКСК) се соочува со сериозни предизвици во одржувањето на транспарентноста и отчетноста во изборниот процес за 2024 година. Во својот најнов извештај, ДКСК алармира дека поради правни празнини во законската регулатива, Комисијата не може да покрене прекршочни постапки против оние кои не ги доставуваат потребните податоци. Она што е најзагрижувачко е фактот дека дури 826 институции не ги доставиле потребните информации, меѓу кои и 10 министерства. Ова укажува на сериозен недостаток на транспарентност и може да се интерпретира како обид за прикривање на потенцијални неправилности. Изборниот законик, исто така, е предмет на критика во извештајот. ДКСК укажува на слабости во правната и административната рамка, кои создаваат ризици за корупција.
Дестан Јонузи
