Германската крајно десничарска партија Алтернатива за Германија (АфД) се најде во центар на скандали со непотизам, откако беа откриени случаи на вработување членови на семејства на партиски функционери на добро платени позиции, објави Дојче Веле.
Според извештаите, неколку пратеници од покраинскиот парламент и Бундестагот во сојузната покраина Саксонија-Анхалт наводно вработиле свои роднини во канцелариите на партиски колеги, при што тие добивале високи плати финансирани од државниот буџет.
Во центарот на критиките се најде Улрих Зигмунд, носител на листата на АфД за покраинските избори во септември, кој се надева да стане првиот премиер на покраина од редовите на оваа партија. Според наводите, неговиот татко бил вработен во канцеларија на пратеник во Бундестагот со годишна плата од речиси 100.000 евра.
Зигмунд не ги негирал обвинувањата, но изјавил дека вработувањето било оправдано поради тешкотиите да се најде „доверлив персонал“. Ваквата практика, иако предизвикува критики, формално не е незаконска, бидејќи законите забрануваат пратениците да вработуваат директно свои роднини, но не и роднини на партиски колеги.
Внатрешни конфликти и борба за влијание
Политикологот Александер Хенсел од Универзитетот во Гетинген оцени дека скандалот може да предизвика сериозни внатрешни конфликти во партијата.
„За разлика од други случаи, овој скандал не доаѓа однадвор, туку е поттикнат од луѓе од самата партија, што лесно може да предизвика внатрешни судири“, изјави Хенсел за Дојче Веле.
Меѓу најгласните критичари е Бјорн Хеке, лидер на АфД во Тирингија, кој предупреди дека ваквите случаи можат сериозно да ја загрозат партијата.
АфД соочена со повеќе скандали
Овој случај е само дел од низата контроверзии со кои се соочува АфД во последниот период. Претседателката на германскиот парламент им забрани влез во Бундестагот на седум соработници на партијата поради безбедносни причини, додека други функционери се соочуваат со обвиненија за незаконско финансирање, перење пари и поврзаност со екстремистички структури.
Во исто време, во врвот на партијата постојат и несогласувања околу надворешната политика, вклучително и односите со Русија и САД.
Според анализите, скандалот со непотизам може да има сериозни последици врз имиџот на АфД, која се позиционира како алтернатива на традиционалните политички партии и критичар на политичкиот естаблишмент.
