Украина денес е во 373-от ден војна, откако Русија изврши инвазија врз земјата.
Ова се главните теми кои го одбележаа денешниот ден.
Германија побара од Швајцарија да и продаде дел од своите тенкови „Леопард 2“, за да може да додели поголема воена помош за Украина. Германија, Полска, Португалија, Финска и Шведска се меѓу земјите кои испраќаат „Леопарди“ во Украина, но со тоа го проретчиле својот воен арсенал.
Украина нареди делумна евакуација на жителите на Купјанск, во регионот на Харкив, каде има напредување на руските сили, соопшти воената администрација.
Војската на САД не обезбедува ресурси за Украина да изведува напади надвор од нејзината територија, изјави синоќа портпаролот на Пентагон, бригадниот генерал Пат Рајдер. Изјавата доаѓа откако вчера во руски медими и на социјалните мрежи се објавија непотврдени извештаи за диверзантски напад во Русија, изведен од страна на руска националистичка милитантна група во областа Брјанск, во село близу руско-укринската граница, а која пристигнала од Украина. Во нападот наводно загинале две лица, а неколку биле киднапирани.
Олигархот Олег Дерипаска изјави дека Русија би можела да остане без пари до следната година, освен ако земјата не обезбеди инвестиции од „пријателските“ земји, бидејќи санкциите од западот сериозно ќе ја погодат Русија.
Една година од почетокот на инвазијата на Русија врз Украина, рускиот извоз на фосилни горива сè уште се одвива во повеќе земји ширум светот. Според проценките на Центарот за истражување на енергија и чист воздух (CREA), од почетокот на инвазијата пред околу една година, Русија остварила повеќе од 315 милијарди долари приход од извозот на фосилни горива низ целиот свет, со речиси 149 милијарди долари кои доаѓаат од земјите на ЕУ.
Руските сили во текот на ноќта го разнесоа клучниот мост што го поврзува опколениот град Бахмут во источна Украина со блиското село Хромово. Полицијата во градот Константинивка изјави за Си-Ен-Ен дека се надева дека мостот ќе биде поправен во наредните денови, бидејќи тој е витална артерија за евакуација на цивили и испорака на залихи како муниција
Украина и Шпанија ќе соработуваат на полето на развојот на зелените инвестиции, како и на вклучувањето на Украина во работата на процесот на Севиља.
Во регионот Херсон, возач на трактор беше убиен од непријателско гранатирање во близина на селото Томарине во областа Берислав. Непријателот го нападна и селото Козатске во областа Каховка, при што беа повредени две лица. Уште едно лице е повредено во Херсон.
Украина има право да ги ослободи и да ја врати целосната контрола на сите привремено окупирани територии во нејзините меѓународно признати граници, вклучувајќи го и Крим, се вели во соопштението на ЕУ дадено за време на состанокот на Постојаниот совет на ОБСЕ.
Подготви: А. Ристески
