Арбен Таравари од албанскиот опозициски блог на Европскиот сојуз за промени (ЕСП), кој со спојувањето на Алијансата за Албанците беше преименуван од ЕСП во ВЛЕН (ВРЕДИ), ја објави својата кандидатура и амбиција да стане претседател на државата.
Од друга страна, како што дознава „Фронтлајн“ од партиски извори во ДУИ, првичната идеја на Али Ахмети била сите албански партии да поддржат албански натпартиски кандидат за претседател, но со кандидатурата на Таравар – сега и Демократскaта унија за интеграција најавува кандидатура за претседател на Северна Македонија.
Дали актуелниот шеф на дипломатијата Бујар Османи или самиот Али Ахмети ќе биде кандидат за претседател ќе одлучат партиските органи на ДУИ кои се очекува наскоро да заседаваат. Но, самиот Ахмети стави до знаење дека оваа партија ќе има свој кандидат.
– Бидејќи беше политизирана кандидатурата за претседател, и ДУИ ќе има свој кандидат, изјави Али Ахмети на свеченоста што се одржа во албанскиот Театар во Скопје по повод 16-годишнината од прогласувањето на независноста на Косово.
Таравари во објава на социјалните мрежи побара противкандидат од ДУИ да му биде Али Ахмети.
– …Отворено го поканувам господинот Али Ахмети да се натпреварува и граѓаните да одберат кој подобро ги претставува, вели Таравари.
Најголемата партија во земјава, СДСМ, на претседателските избори најверојатно ќе настапи со актуелниот претседател Стево Пендаровски. Но, во листата на кандидати на социјалдемократите се и поранешниот премиер Зоран Заев, поранешниот министер за внатрешни работи Оливер Спасовски, поранешната министерка за одбрана Радмила Шекеринска, кои исто така добро стојат со поддршка и во партиските бази, а и во спроведените партиски анкети.
Од опозициската ВМРО-ДПМНЕ, професорите Гордана Силјановска Давкова и Александар Спасеновски се сериозни кандидати да настапат на претседателските избори со логото на партијата на Мицкоски. Кандидатурата на еден од овие двајца претенденти или на трет ќе биде официјализирана по партиската конвенција на 2 март.
Во случај Мицкоски да се реши да се натпреварува со поранешната кандидатка за шеф на државата Силјановска Давкова, со која своевремено ги загуби изборите, главен опозициски ривал ќе им биде кандидатката на Левица, професорка Билјана Ванковска.
Споредено со претседателските избори од 5 мај 2019 година – на кои се натпреваруваа тројца кандидати: Стево Пендаровски од Коалицијата на СДСМ, поддржан и од ДУИ на Али Ахмети, Гордана Силјановска Давкова од коалицијата на ВМРО ДПМНЕ и Блерим Река од коалицијата на Албанската опозициска Алијанса за Албанците и Алтернатива, на претседателските избори на 24 април ќе имаме пет кандидати во трката, но не е исклучено и шести да се појави како независен.
Арбен Таравари како заеднички кандидат на албанската опозиција и Билјана Ванковска како кандидатка на „Левица“ се единствените кои јавно ги објавија своите кандидатури за претседател на државата. И двајцата мора да соберат по 10.000 потписи бидејќи немаат доволно пратеници во Собранието.
Лидерот на СДСМ Димитар Ковачевски изјави дека во изминатите 18 месеци 18-те комисии на СДСМ со 200 експерти работеа на новата изборна програма 2024-2028. Како што нагласи, програмата ќе има конкретна мерки за економска благосостојба, напредок на општествените процеси и продолжување и заокружување на европската интеграција.
Првиот круг од претседателските избори ќе се одржи на 24 април, а вториот круг на 8 мај, кога треба да се одржат и парламентарните избори. Изборната кампања за претседателските избори започнува на 4 април, а завршува на 22 април. За парламентарните избори кампањата започнува на 18 април, а завршува на 6 мај.
Претстојните претседателски избори се седми на кои, од независноста, граѓаните гласаат за шеф на државата, позиција која досега ја извршуваа Киро Глигоров, Борис Трајковски, Бранко Црвенковски, Ѓорѓе Иванов и Стево Пендаровски.
Како се станува победник
Согласно Изборниот законик, во првиот круг еден кандидат може да стане претседател само ако освоил 50% плус еден од гласовите од вкупниот број гласачи запишани во избирачкиот список.
Во вториот круг излезноста треба да е 40 проценти за да може да се избере претседател.
Дестан Јонузи
