Извештајот на Европскиот парламент и анкетите за евроинтеграцијата ги заоструваат политичките дебати во земјава, додека Албанија бележи рекорден напредок во преговорите со ЕУ
Претседателот на СДСМ, Венко Филипче, од Свети Николе испрати силна порака за иднината на државата и за претстојните локални избори. Тој обвини дека земјата се соочува со хаос во институциите, тотална партизација, селективна правда и стагнација на економијата.
– Што ќе бидеме ако продолжи ВМРО-ДПМНЕ и нивните партнери без контрола да владеат? Ќе бидеме тешка периферија на Европа, ќе тонеме во сиромаштија и ќе имаме милијарди кредити за враќање, изјави Филипче, додавајќи дека младите веќе не гледаат перспектива и масовно ја напуштаат државата.
Тој нагласи дека СДСМ има обврска да ја врати надежта кај граѓаните преку силна и мотивирачка кампања.
– Нашата иднина е заеднички да ја изградиме државата на европскиот пат и да обезбедиме подобар живот дома, порача Филипче.
Премиерот Христијан Мицкоски, пак, во телевизиско интервју минатиот месец истакна дека Македонија нема да стане членка на Европската унија по секоја цена. Тој потсети на отстапките кои државата ги правела изминативе децении и предупреди дека „идентитетот повеќе нема да се менува“.
Мицкоски предложи заедничка резолуција со Бугарија во Европскиот парламент, со која јасно ќе се признае македонскиот јазик и идентитет.
ЕУ бара реформи, поддршката на граѓаните расте
Европскиот парламент во најновата порака потврди дека го поддржува евроинтегративниот процес на Северна Македонија, но нагласи дека се неопходни силни реформи, вклучувајќи уставни измени и борба против корупцијата.
Анкетата на Евробарометар покажува дека 69 проценти од граѓаните во Македонија го поддржуваат членството во ЕУ. Поддршката за проширувањето е особено висока кај младите, но загрижувачки е фактот што мнозинството граѓани во регионот се чувствуваат недоволно информирани за процесот.
Во рамките на ЕУ, најголема поддршка за проширувањето бележат Шведска (79%) и Данска (75%), додека најниска има во Чешка и Франција (43%).
Албанија со рекорден напредок во преговорите
Албанија, пак, бележи историски успех во процесот на евроинтеграцијата. Во Брисел беа отворени уште четири поглавја од преговорите, со што бројката достигна 28 за само 11 месеци – што премиерот Еди Рама го оцени како „рекорден апсолут“.
– Горд сум за Албанија! За 11 месеци отворивме 28 поглавја, остануваат уште пет и сакаме да ги затвориме до крајот на годината, изјави Рама.
Според комесарката за проширување Марта Кос, брзината на Албанија во преговорите е импресивна, а целта е до 2027 година сите поглавја да бидат затворени.
Северна Македонија е кандидат за членство во ЕУ од 2005 година, најдолго од сите досега чека на почеток на преговори.
Дестан Јонузи
