Русија во текот на 2025 година претрпела огромни човечки загуби во војната во Украина, со проценети повеќе од 400.000 убиени или ранети војници само во изминатата година. Со тоа, вкупниот број руски жртви од почетокот на инвазијата достигнува околу 1.118.000 лица, што е повеќе од целокупниот број војници со кои Москва располагала пред почетокот на војната, покажуваат најновите податоци на британската воена разузнавачка служба, објавени од The Telegraph.
Тактика на „топовско месо“
Според западните проценки, руските сили и понатаму ја применуваат тактиката на таканаречено „топовско месо“, жртвувајќи огромен број војници во масовни пешадиски напади со цел постепено освојување територии во источна Украина. Стапката на загуби била особено висока за време на обидите за заземање на стратешки важниот град Покровск, кој и натаму не е целосно под руска контрола.
The Economist проценува дека Русија од почетокот на конфликтот можеби изгубила и до 1 процент од својата машка популација во воено способна возраст. Иако Москва строго ги крие официјалните бројки, до летото 2025 година се сметало дека руските загуби се околу 15 пати поголеми од оние во текот на десетгодишната советска војна во Авганистан.
Финансиски мамки за сиромашните региони
Со цел војната да остане подалеку од урбаната и политичката елита, руските власти се обвинети дека користат високи финансиски стимуланси за регрутација на мажи од посиромашните и периферни региони. Еднократните бонуси за потпишување договор за воена служба достигнуваат и износ еквивалентен на повеќегодишна просечна плата, што, според критичарите, претставува директно привлекување на економски ранливи групи во редовите на армијата.
Зеленски: Нападите покажуваат дека Путин не е сериозен за мир
Украинскиот претседател Володимир Зеленски изјави дека во последниот бран напади Русија таргетирала најмалку 13 региони низ Украина, токму во момент кога граѓаните се подготвувале да го одбележат Божик со своите семејства. Според него, ваквите напади се јасен сигнал дека Москва не настапува искрено во мировните преговори.
„Путин сè уште не може да прифати дека мора да престане со убивањето. Тоа значи дека светот не врши доволно притисок врз Русија. Сега е време за одговор“, напиша Зеленски на социјалната мрежа X.
Изјавата доаѓа во момент кога преговарачките тимови од Кијив и Москва се враќаа од тридневните разговори во Мајами, каде што, со посредство на Соединетите Американски Држави, се обидоа да се најде пат кон политичко решение на војната.
Зеленски истакна дека Украина и САД постигнале договор за, како што рече, „прилично солидни безбедносни гаранции“, додавајќи дека е подготвен и посебен билатерален документ за безбедносни гаранции меѓу Кијив и Вашингтон, изработен од преговарачките тимови на Украина и поранешниот американски претседател Доналд Трамп.
„Сè што беше можно да се направи за првите нацрти – веќе е направено. Планот има 20 точки. Не е совршен, но постои и е многу близу до реален резултат“, изјави украинскиот претседател.
Разговорите во Мајами, организирани од Стив Виткоф, специјален пратеник на Доналд Трамп, биле дел од поширок дипломатски напор во кој паралелно учествувале и претставници на европските сојузници на Украина. Американскиот претседател Доналд Трамп подоцна изјави дека разговорите „одат во добра насока“, но избегна да зборува за конкретен пробив.
Во меѓувреме, Кремљ веќе сигнализираше дека се противи на ревидираните американски предлози, оценувајќи ги како неприфатливи. Рускиот претседателски пратеник Кирил Дмитриев, кој одделно се сретна со американската делегација, најави дека ќе го информира Кремљ за ажурираните позиции.
На терен, борбите продолжуваат со несмален интензитет. Украинскиот 7. воздушно-десантен корпус соопшти дека состојбата околу градот Сиверск е „исклучително тешка“, додека руските сили ги засилуваат обидите за премин преку реката Донец.
Редакција Фронтлајн
