Опозициската СДСМ подаде рака до сите партии за системски, темелни реформи во државата. Ииницијативата предложена од СДСМ и од претседателот Венко Филипче е во насока на воспоставување на нов концепт за политички дијалог.
– Иницијативата е еден чесен пристап кон нашите граѓани, носење на одговорност во однос на сите реформи кои треба да бидат направени. СДСМ подаде рака до сите политички партии со јасен, концепт по однос на спроведување на системски, темелни реформи, кои се однесуваат на образованието, здравството, правосудството на животната средина, сè она што нашите граѓани го очекуваат, изјавија од партијата.
Новинарот и политички аналитичар Сеад Ризвановиќ смета дека поставувањето на нов политички стандард преку дијалог околу реформската агенда е позитивен сигнал, особено во контекст на една демократска транзиција каква што ја минува Северна Македонија.
Но, додава тој, клучното прашање е навистина суштинско: дали таков дијалог може да функционира во реалноста на силно поларизирана политичка и општествена елита?
– Во едно општество каде што политичките субјекти често функционираат на база на конфронтација, а не соработка, дијалогот тешко се одржува како суштинска и континуирана вредност. Главните пречки може да бидат во недовербата меѓу партиите, особено по години обвинувања за корупција, изборни нерегуларности и клиентелизам. Партизација на институциите, што го отежнува воспоставувањето на независни тела кои би можеле да ја водат реформската агенда. Ниска култура на компромис, што често го претвора секој обид за дијалог во натпревар за политички поени. Сепак, ако постои внатрешен притисок од јавноста и надворешен од меѓународните партнери како ЕУ, тогаш можеби има шанса за краткорочен консензус околу најкритичните прашања – судските реформи, изборниот модел, економските мерки. Дијалогот сам по себе не е магично решение, но е неопходен прв чекор. Прашањето не е само дали тој ќе функционира, туку дали политичките елити се подготвени да платат политичка цена за долгорочна добивка, изјави Ризвановиќ за Фронтлајн.
По иницијатива на претседателот на СДСМ, Венко Филипче се одржа прва средба со премиерот Христијан Мицкоски во Владата, на која беше разгледан предлогот за нов модел на политичка соработка насочена кон решавање на клучните прашања од интерес на граѓаните, што претседателот на СДСМ го презентираше вчера.
– Имавме добар и конструктивен состанок со премиерот. Јасно е дека до него стигна пораката, барањето на граѓаните за некаква форма на заедничка работа во сфери коишто се битни за подобрување на квалитетот на нашето живеење, изјави Филипче по средбата.
На средбата начелно беше договорено формирање заеднички тела или работни групи кои ќе работат на спроведувањето на реформската агенда, потенцираше Филипче. Првичниот фокус ќе биде на законите поврзани со правосудството, енергетиката и стратешките проекти во здравството, кои треба да стигнат во Собранието.
– Во следниот период ќе номинирам неколку експерти од областа на правосудството и енергетиката, кои ќе се вклучат во изработката на овие законски решенија, нагласи Филипче, додавајќи дека ова е почеток на еден процес во кој ќе треба да се разработи методологијата на соработка.
Претседателот на СДСМ истакна дека во иднина очекува и другите политички партии да се приклучат на овој модел на соработка, потенцирајќи дека „мора да испратиме порака на обединување за доброто на државата“.
На средбата, Филипче и Мицкоски разговараа и за уставните измени поврзани со евроинтеграциите, каде што, според Филипче, постојат различни позиции.
„За ова останува да зборуваме понатаму“, рече тој.
Дестан Јонузи
