На апел на градоначалникот на Илија Јованоски, во Прилеп од неодамна за воспоставување на ред и избегнување на гужва, а со цел одржување на физичка дистанца на граѓаните и за намалување на ризикот од ширење на корона вирусот, помага и Армијата. 15 војници се распоредени пред поголемите маркети и пред банките каде што се правеа гужви.
Прилепчани велат, откако се забележуваат војниците пред маркетите и банките нема гужви за влез и граѓаните се држат на пропишаното растојание кое Општина Прилеп го обележа со налепници и пред поголемите маркети и експозитури на банки.
Овие фотографии се од маркет во Скопје, а сликата што може да се забележи не е ни малку различна од таа што ја има во другите градови.
Маркетот е преполн со луѓе. Ред на влегување никој не воспоставува ни пред маркетот ни внатре. Единствено на касите колку толку се почитува редот, но и тоа е заслуга на одговорноста на самите муштерии. Персоналот од маркетот професионален и љубезен и за секоја пофалба, но нема никаков ред за тоа колку луѓе треба да влезат а да не се направи несакана гужва која во вакви околности на пандемија не предизвикува само нервоза и тензија, туку е и опасност по здравјете и животот на граѓаните.
Велигденските празници се ближат, а овие слики од големите маркети ќе бидат уште почести и уште поопасни како што се наближува продолжениот викенд.
Ако веќе се решило дека физичката дистанца е таа која дава резултат, ако се воспоставил полициски час што ограничува движење, тогаш со само една посета на маркет, паѓаат во вода сите тие мерки и препораки на кои упорно се инсистира да се почитуваат сѐ со цел да се спречи ширењето на вирусот и да се заштити здравјето и животот на граѓаните.
Ќе се повтори ли сликата на војници што ставаат ред пред маркетите од Прилеп и во Скопје, или тоа ќе го направи менаџментот на маркетите, останава да видиме.
Ј. Ѓорѓиоски
