- НАТО ги зголемува инвестициите во производството на муницијата.
- Балоните се дел од засилените разузнавачки операции на Кина и Русија.
- НАТО работи на подобрување на соработката меѓу сојузниците и за безбедносни прашања поврзани со вселената.
Генералниот секретар на НАТО, Јенс Столтенберг одговори на голем број прашања на речиси едночасовната прес конференција во Брисел со која го најави утрешниот состанок на министрите за одбрана на НАТО. Меѓу другите, новинарот на АФП го постави прашањето за капацитетот на НАТО да ја снабдува Украина со муницијата која е толку потребна во пресрет на руската офанзива.
Ова прашање (за муницијата) почнавме да го разгледуваме минатата година, затоа што видовме дека единствениот начин да се испорача големиот износ на поддршка за Украина е преку копање во нашите постоечки залихи. Но, секако, долгорочно, не можеме да продолжиме да го правиме тоа, туку мора да произведеме повеќе, за да можеме да испорачаме доволно муниција за Украина, но истовремено, да обезбедиме доволно муниција за да ги заштитиме и одбраниме сојузниците на НАТО, секоја педа од сојузничката територија, рече Столтенберг.
Како и во своето излагање на почетокот на прес конференцијата, Генералниот секретар на НАТО најави и зголемување на индустриското производство на муниција во земјите членки на Алијансата, што ќе значи и поголеми трошоци за одбраната.
Неколку сојузници веќе имаат одлучено и договорено долгорочни договори со индустријата, за да можат да ги зголемат инвестициите за производство за зголемување на инвестициите. Така што сум убеден дека сека сме на вистинскиот пат, што ќе ни овозможи и да продолжиме да ја поддржуваме Украина, како и да ги обновиме нашите залихи. А тоа само ја покажува важноста за зголемени трошоци за одбрана. Поради сето ова, се разбира, потребни се поголеми трошоци за одбрана од страна на НАТО сојузниците, изјави Столтенберг.
Во врска со балоните што беа забележани и соборени во Северна Америка, беше поставено прашањето дали НАТО го засилува своето надгледување и на Европа.
Мислам дека тоа што го видовме на САД – јас бев во САД минатата недела – е дел од една шема, каде Кина, но и Русија, ги зголемуваат своите разузнавачки активности против НАТО сојузниците со многу различни платформи. Тоа го гледаме со сајбер просторот. Го гледаме со сателитите, сé повеќе сателити, а го гледаме и со балоните, изјави Столтенберг.
Затоа, според генсекот на НАТО, потребна е поголема будност и присуство во одбраната на воздушниот простор, но и споделување на разузнавачки податоци меѓу сојузниците.
Тоа ја истакнува важноста на нашата будност, нашето зголемено присуство, како и дека треба да се засилиме во однос на тоа како споделуваме разузнавачки податоци и како го набљудуваме и штитиме нашиот воздушен простор. А всушност, едно од прашањата што ќе го разгледуваме на министерскиот состанок утре е зголемената соработка помеѓу сојузниците во вселената, рече Столтенберг.
Тоа, според него, значи споделување повеќе податоци, собирање повеќе податоци и од комерцијалните сателити и потоа нивно споделување со структурата на НАТО командата.
Значи, тоа е дел од севкупната слика, како правиме повеќе за да мониторираме и да имаме доволно надгледување. Ова го штити целиот наш воздушен простор, изјави генералниот секретар на НАТО, Столтенберг.
Извор: Цивил Медиа
