Скопје и Тирана може да се разделат во нивниот пат кон Европската унија (ЕУ). На 19 јули 2022 година двете земји ја одржаа првата меѓувладина конференција во Брисел, додека сега Европската комисија го закажа вториот состанок за месец ноември со Албанија.
Во меѓувреме, Владата предводена од Христијан Мицкоски чека стабилна политичка влада во Бугарија, со која, како што изјави премиерот, ќе се разговара за идејата за ретроактивни (одложено дејство) уставни измени, со кои се очекува да се деблокира процесот.
– Не би коментирал ниту чекор повеќе ниту чекор помалку. Сега е периодот кога апсолутно ништо не може да се случи во тој процес, изјави Мицкоски.
Извршниот директор на ЕВРОТИНК, Димитар Николовски, во изјава за „Фронтлајн“ вели дека закажувањето на втората меѓувладина конференција со Албанија е дефинитивен индикатор дека и овој наш сосед повеќе ќе напредува во евроинтеграцискиот процес од нас.
– Иако комесарот Вархеји не ја исклучи можноста и Северна Македонија да има своја меѓувладина конференција, со оглед на односите со Бугарија, оваа веројатност е многу мала. Ова секако не значи дека, доколку во блиска иднина почнеме да ги отвораме кластерите, нема да ги стигнеме и Албанија, Црна Гора и Србија, со оглед на фактот дека имаме покажано добар напредок на скринзите. Но, во овој момент сè уште чекаме на формалното отворање на кластерите, нагласува Николовски.
Мојот впечаток, додава нашиот соговорник е дека моментално не постои спор со Бугарија кој би го решила евентуално постабилна влада таму.
– Од страна на нашата влада, има желба за ре-преговарање на условите за нашето зачленување во ЕУ, но во Бугарија ова прашање е затворено со францускиот предлог. Моменталните очекувања се дека повторно нема да има стабилна влада во Бугарија и после претстоечките избори. Но, и да се случи тоа, нереално е да се очекува дека постабилна влада би имала некаков поголем слух за барањата на нашата влада, и дека би „попуштиле“ за уставни измени со одложен рок, подвлече тој.
Поранешниот пратеник, Зуди Џелили потенцира дека секој политичар во Северна Македонија знае дека уставните измени се услов за добивање датум за преговори за членство во ЕУ, тоа го знае, вели тој, и премиерот Мицковски, кој најави дека чека Бугарија да добие нова влада и да разговара можен компромисно решенија.
– Меѓутоа, самиот француски предлог е на некој начин компромисно решение, не знам дали во Бугарија некој од политичките фактори имаат разбирање да преговарат пак. Знам само дека се неопходни уставни измени за ние како држава да направиме чекор кон преговори заедно со Албанија. Но, немаме друга алтернатива за подобра иднина, прво треба да ги надминеме партиските интереси во корист на државните. Соработката со соседите, со Советот на Европа треба да се базира на интересот за подобра иднина, а не на враќање во минатото, изјави Џелили за „Фронтлјан“.
На потребата од донесување на уставните измени укажуваат претставници на Меѓународната заедница кои во изминатиот период упатуваат пораки дека промената на Преамбулата е гаранција за отворање на преговорите на Северна Македонија со ЕУ.
Дестан Јонузи
