Украинскиот претседател Володимир Зеленски соопшти дека разговарал со специјалниот пратеник на американскиот претседател Доналд Трамп, Стив Виткоф, како и со зетот на Трамп, Џаред Кушнер, за можни начини за ставање крај на војната со Русија.
„Тоа беше навистина добар разговор, разговаравме за многу детали. Се појавија некои нови идеи за тоа како да се приближиме до вистински мир – во однос на форматот, средбите и временската рамка“, објави Зеленски на Телеграм.
Преговори за мировен план
Трамп се залага за постигнување договор за завршување на речиси четиригодишната војна, а во изминатите недели мировните напори, кои ги предводат Виткоф и Кушнер, бележат постепен напредок. Претходно оваа недела, Зеленски претстави нацрт мировен план од 20 точки, кој го опиша како основна рамка за завршување на конфликтот.
Овој документ претставува скратена верзија на претходниот план од 28 точки, за кој САД претходно разговарале со руската страна. Тој план, според дипломатски извори, во голема мера ѝ одговарал на Москва, бидејќи предвидувал отстапување на територии од страна на Кијив и ограничување на големината на украинската армија.
Зеленски изјави дека клучните територијални прашања остануваат нерешени во новиот нацрт и додаде дека за најчувствителните теми ќе биде неопходна директна средба со Трамп.
Москва ги анализира документите
Портпаролот на Кремљ, Дмитриј Песков, изјави дека Русија ги анализира документите за завршување на војната, кои во Москва ги донел рускиот специјален пратеник Кирил Дмитриев од САД. Белата куќа засега не даде официјален коментар.
Во меѓувреме, портпаролката на руското Министерство за надворешни работи, Марија Захарова, го отфрли како лажен извештајот на Bloomberg за наводни руски амандмани на американскиот мировен план, тврдејќи дека медиумот нема сигурни извори блиски до Кремљ. Реакцијата следуваше по објавувањето на планот од 20 точки, кој Москва го смета само за почетна основа за преговори и со кој не е задоволна, особено поради прашањата поврзани со Донбас, НАТО и големината на украинската армија.
Зеленски соопшти и дека главниот украински преговарач Рустем Умеров планира уште еден разговор со американските преговарачи во текот на вечерта.
„Навистина работиме 24 часа на ден, седум дена во неделата, за да го приближиме крајот на оваа брутална руска војна против Украина и да осигуриме дека сите документи и чекори се реални, ефикасни и доверливи“, изјави Зеленски.
