„Хибридните војни, заканата врз демократијата е глобален феномен. Ние не смееме по никоја цена да го оставиме тоа поле неодбрането, ние мора да одговориме на таа закана со сите механизми кои ни се на располагање“, истакна националниот координатор за интеркултурализам, Роберт Алаѓозовски, на јавниот настан на ЦИВИЛ, одржан на 26 мај 2021, на тема „Европските вредности – (не)возможна мисија: Еднаквоста, недискриминацијата и мултикултурализмот низ призмата на политиките и практиките на национално ниво“, на прашањето – Како можат хибридните закани против демократијата да го разнишаат општеството, особено ако имаме општество кое се труди да ја промовира еднаквоста, недискриминацијата, мултикултурализмот?
„Заканата е глобална. Јас членувам како кординатор за „Едно општество“ на експертско тело при Советот на Европа, таму зборувавме на ова прашање со сите земји членки на СЕ и сите набљудувачки мисии кои се при оваа организација. Хибридните војни, заканата врз демократијата е глобален феномен. Ние не смееме по никоја цена да го оставиме тоа поле неодбрането, ние мора да одговориме на таа закана со сите механизми кои ни се на располагање. Дел од Стратегијата е формирањето на мрежата против говор на омраза при Советот за етика на медиумите (СЕЕМ) во рамки на здружението на медиуми и медиумските работници кај нас и сега треба таа мрежа што повеќе да јакне и има поддршка од нас.
Сега треба „топката“ да ја вратиме и кај самите медиуми и борбата да биде активистичка и саморегулативна, а не само казнена политика што ќе пропишеме. Редакциите треба да формираат интеркултурни работилници за своите вработени да ги обучат да препознаваат говор на омраза.
Констатирано е дека има мал број на судски пресуди на кривични дела направени од говор на омраза. Говорот на омраза е дел од нашиот кривичен законик, и го охрабруваме судството да донесе пресуди кои ќе ги санкционираат овој вид кривични дела.
Борбата мора да постои на повеќе нивоа, но многу е битна и партиципативната улога и учеството на граѓанското општество“, потенцира Алаѓозовски.
Дехран Муратов / ЦИВИЛ МЕДИА
