Првите луѓе што ќе стапнат на Марс треба да го усмерaт својот главен научен фокус кон откривање траги од минат или сегашен живот на Црвената планета. Тоа е централниот заклучок на сеопфатниот извештај објавен од Националните академии на науките, инженерството и медицината на САД (National Academies) на 9 декември.
Документот од 240 страници, со наслов „A Science Strategy for the Human Exploration of Mars“, е подготвен за НАСА, која има цел да испрати астронаути на Марс веќе во средината на 2030-тите.
Главната мисија: потрага по живот
Во извештајот стои:
„Откривањето на живот на Марс е постојан врвен приоритет за истражувачите од многу дисциплини, и тоа е највисоката научна цел во овој извештај.“
Стратегијата препорачува 11 клучни научни цели за идните човекови мисии, од кои првата е потрагата по биолошки сигнатури, пребиотска хемија и проценка дали Марс некогаш бил или сè уште е погоден за живот.
Останатите научни цели опфаќаат: детално проучување на водните и јаглерод-диоксидните циклуси, мапирање на геологијата, ефектите на марсовската средина врз човековото здравје, потеклото на прашинските бури, достапност на ресурси за долготрајно престојување, влијание на Марс врз ДНК, микробиолошка динамика, ефектите од марсовска прашина, однесување на земјини микроби и растенија на Марс и анализирање на радијациската околина.
Четири можни кампањи со по три мисии
Стратегијата предлага четири можни човекови кампањи, секоја составена од три главни мисии.
Највисоко рангираната предвидува:
- прво кратко слетување со екипаж од 30 солови (Sol = марсовки ден. 30 солови = околу 31 земјин ден),
- претходен карго-лет без екипаж,
- и потоа 300 солови долга мисија.
Локацијата би била регија на ниски до средни географски широчини со подповршински мраз и разновидна геологија. Потрагата по живот би се насочила кон ниши блиску до површината, краткотрајно населиви зони или слоевити ледени структури.
Алтернативна кампања би се фокусирала на длабоки подземни слоеви со дупчење од 2 до 5 километри, каде можеби се задржува течна вода.
Предлог: Научна лабораторија на површината и враќање примероци
Извештајот препорачува, без разлика на изборот на сценарио, секоја мисија:
- да вклучува површинска научна лабораторија,
- да враќа марсовски примероци на Земјата,
- и да воспостави годишен „Mars Human-Agent Teaming Summit“ за координација на роботски системи, астронаути и вештачка интелигенција.
Проблем: планетарна заштита
Останува предизвикот со строгите правила за planetary protection, кои треба да спречат загадување на Марс со земни микроби или враќање загаден материјал на Земјата.
Поради тоа, Националните академии препорачуваат:
„НАСА да продолжи да учествува во еволуцијата на планетарните заштитни насоки, со цел да се овозможи на човечките експлоратори да работат во региони кои потенцијално би можеле да поддржат или да содржат живот.“
Редакција Фронтлајн
