Производителите на медицинска опрема сè побрзо воведуваат вештачка интелигенција (ВИ) во своите уреди, но американските регулатори бележат растечки број пријави за дефекти и повреди на пациенти, покажува истражување на Ројтерс.
Еден од најекспонираните случаи е навигацискиот систем TruDi за хируршко лекување на хроничен синузитис, развиен од компанијата Acclarent, поранешна подружница на Johnson & Johnson. Откако во 2021 година во уредот бил додаден алгоритам за машинско учење, американската FDA примила најмалку 100 пријави за дефекти и несакани настани, во споредба со осум пријави во периодот пред воведувањето на ветачка интелигенција.
Според извештаите, најмалку 10 пациенти биле повредени меѓу крајот на 2021 и ноември 2025 година. Во повеќето случаи, системот наводно ги дезориентирал хирурзите за позицијата на инструментите за време на операции во пределот на главата, што довело до сериозни последици, меѓу кои истекување на цереброспинална течност, оштетување на основата на черепот и мозочни удари.
Двајца пациенти поднеле тужби во Тексас, тврдејќи дека вештачката интелигенција во TruDi системот придонела за нивните повреди. Компанијата Integra LifeSciences, која во 2024 година ја купи Acclarent, ги отфрла обвинувањата и наведува дека нема докази за причинско-последична врска меѓу ВИ и пријавените инциденти.
Истражувањето на Ројтерс покажува дека TruDi не е изолиран случај. FDA има одобрено најмалку 1.357 медицински уреди со вештачка интелигенција, двојно повеќе отколку до 2022 година. Во базите на податоци се евидентирани стотици пријави за проблеми кај други ВИ-уреди, вклучително и срцеви монитори што не детектирале абнормален ритам и ултразвучни системи што погрешно идентификувале делови од феталното тело.
Дополнително, истражување објавено во JAMA Health Forum покажува дека 60 FDA-одобрени уреди со вештачка интелигенција биле поврзани со 182 повлекувања од пазарот, при што 43 отсто од нив се случиле во рок од една година од одобрувањето – двојно повисока стапка од просекот за медицински уреди.
Пет сегашни и поранешни научници од FDA за Ројтерс изјавиле дека агенцијата тешко се справува со бранoт ВИ-уреди, особено по намалувањето на стручниот кадар. Дел од специјализираните тимови за ВИ биле распуштени или значително ослабени, што, според нив, го зголемува ризикот од пропусти во регулаторниот надзор.
Од американското Министерство за здравство и социјални служби порачуваат дека FDA и понатаму применува „строги стандарди“ и дека безбедноста на пациентите останува највисок приоритет, но експерти предупредуваат дека постојниот модел на одобрување медицински уреди не е прилагоден на специфичните ризици што ги носи вештачката интелигенција.
Редакција Фронтлајн
