Загубите на руската војска во Украина нагло пораснале, со значително зголемување на бројот на загинати и исчезнати во борбите, покажуваат проценките на европски и украински претставници, објави Financial Times. Овој тренд дополнително ги намалува шансите за пробив на бојното поле каков што посакува рускиот претседател Владимир Путин.
Аналитичарите оценуваат дека наглиот пораст на загубите сериозно ќе им го отежне на руските сили одржувањето на исцрпувачките офанзивни операции, кои на одредени делови од фронтот се забавиле до темпо побавно дури и од битката кај Сома во Првата светска војна.
Помалку доброволци, повеќе присила
И покрај исклучително високите финансиски стимуланси, во Русија нема доволно доброволци подготвени да се приклучат на војната во Украина. Поради тоа, Москва сè почесто регрутира обвинети и осудени лица, врши притисок врз регрутите да потпишат договори по завршувањето на задолжителниот воен рок и повторно испраќа ранети војници назад на бојното поле.
Русија трпи големи човечки загуби во Украина, Путин бара начини да ја пополни армијата без бунт дома
Стапките на дезертирање достигнале највисоко ниво од почетокот на војната, која влегува во својата петта година, според податоците на украинската аналитичка група Frontelligence Insight.
„Путин веруваше дека постојаниот притисок долж широка линија на фронтот на крај ќе доведе до колапс на украинската страна. Но начинот на кој руските сили водат борби едноставно не може да создаде оперативно значајни пробиви“, изјави за Financial Times Мајкл Кофман, виш аналитичар во Фондацијата Карнеги за меѓународен мир.
Русија ги надоместува загубите, но не ги засилува силите
И Украина се соочува со недостиг од човечки ресурси, што ја принуди на одредени делови од фронтот да отстапи територија за да одбие руски напади на други позиции. Сепак, Русија има повеќекратно поголема популација, што ѝ обезбедува значително поширока база на потенцијални регрути.
Иако Москва формално ги исполнува целите за регрутација од околу 35.000 луѓе месечно, дури 90 проценти од новите регрути во 2025 година биле испратени исклучиво како замена за загинатите или ранетите, изјави неодамна главниот командант на украинските вооружени сили Олександр Сирски.
Рускиот претседател Путин во декември изјави дека освојувањето на четирите делумно окупирани украински региони „се одвива според планот“, но според западни и украински извори, напредокот е побавен и со далеку поголеми загуби од која било претходна фаза на војната.
Напредување во метри, загуби во стотици илјади
Најинтензивните руски офанзиви напредуваат со брзина од само 15 до 70 метри дневно, што е побавно отколку во речиси сите војни во последните сто години, се наведува во јануарски извештај на Центар за стратешки и меѓународни студии (CSIS).
Според тој извештај, во војната досега загинале најмалку 325.000 руски војници – петпати повеќе отколку во сите руски и советски војни заедно од Втората светска војна наваму. Овој број е најмалку двојно поголем од украинските загуби.
Украинскиот претседател Володимир Зеленски изјави минатата недела дека секој месец загинуваат или тешко се рануваат меѓу 30.000 и 35.000 руски војници.
Дроновите го прават бојното поле посмртоносно
Интензивната употреба на дронови, која ја одбележа последната година од конфликтот, дополнително им го отежна на руските сили освојувањето територија без огромни загуби. Според извештај на латвиската надворешна разузнавачка служба, дроновите се одговорни за 70 до 80 проценти од загинатите и ранетите на двете страни.
„Ресурсите се туркаат далеку над разумните граници, што доведува до загуби кои често можеле да се избегнат“, изјави поранешен украински офицер од Frontelligence Insight.
Повеќе пешадија, помалку техника
Наместо механизирани напади, руските сили сè почесто се потпираат на пешадија, лесни моторизирани напади и инфилтрациски тактики.
„Во суштина, тие ги заменуваат загубите во техника со многу поголеми загуби во човечки животи“, вели Кофман, додавајќи дека Русија долго време не била загрижена за исцрпувањето на човечкиот потенцијал.
Регионалните буџети под притисок
Системот на високи бонуси за регрутација, кој во голем дел се финансира од регионалните буџети, сè повеќе создава финансиски притисок. Според проценките, регионите минатата година потрошиле најмалку 500 милијарди рубљи за регрутни бонуси.
Иако Русија засега може да ги исполнува целите за регрутација, аналитичарите предупредуваат дека ваквиот модел не е одржлив на долг рок.
„На крајот ќе снема луѓе за кои тие пари ќе вредат толкав ризик“, предупреди Кофман. „Русија се соочува со недостиг од квалификувана работна сила и нема неограничен број мажи подготвени да заминат во војна.“
Редакција Фронтлајн
